इस्राईल- हमास युद्धबंदीसाठी 'हा'नवा प्रस्ताव चर्चेत

Story by आवाज़ मराठी | Published by Fazal Pathan • 1 d ago

इस्राईल- हमास युद्धात उद्ध्वस्त झालेलं शहर.

गाझामधील युद्ध थांबवण्यासाठी आणि शांतता प्रस्थापित करण्यासाठी सातत्याने प्रयत्न होत आहेत. इजिप्तच्या सरकारी वृत्तवाहिनी अल काहेरा न्यूज टीव्हीने सोमवारी सांगितलं की, इजिप्तने हमासपुढे इस्राईलचा एक नवा प्रस्ताव ठेवला आहे. पण हमासच्या वरिष्ठ नेत्याने या प्रस्तावातल्या काही गोष्टी अशक्य असल्याचं म्हटलं आहे. दुसरीकडे, हमासनेही सर्व इस्राईली बंधकांना सोडण्याची तयारी दर्शवली, पण त्याबदल्यात त्यांनी काही मोठ्या मागण्या ठेवल्या आहेत. या सगळ्यामुळे शांततेची बोलणी यशस्वी होणं कठीण बनलं आहे.

प्रस्ताव आणि अटी

हमासचे वरिष्ठ नेते ताहेर अल-नुनु यांनी सांगितलं, “आम्ही सर्व इस्राईली बंधकांना सोडायला तयार आहोत. पण त्यासाठी इस्राईलने गाझामधील युद्ध थांबवावं, आपलं सैन्य पूर्णपणे मागे घ्यावं, काही पॅलेस्टाईन कैद्यांची सुटका करावी आणि गाझात अन्न, पाणी, औषधं यासारखी मानवी मदत पाठवावी. अशी मागणी केली आहे.” त्यांनी इस्राईलवर आरोप केला की, “इस्राईल शांततेच्या बोलणीत टाळाटाळ करत आहे. प्रश्न बंधकांच्या संख्येचा नाही, तर इस्राईल करार पाळायला तयार नाही आणि युद्ध सुरूच ठेवत आहे.”

दुसरीकडे, इस्राईलने ठेवलेला नवा प्रस्ताव हमासला मान्य नाही. हमासचे नेते समी अबू झुहरी यांनी सांगितलं, “इस्राईलने पहिल्यांदाच असा प्रस्ताव ठेवला आहे की, पुढच्या टप्प्याच्या चर्चेत हमासने आपली शस्त्रं खाली ठेवावीत. पण आमच्या प्रतिकाराची शस्त्रं ही आमची ताकद आहे. ती सोडणं अशक्य आहे, यावर बोलणंही शक्य नाही.” हमासने सांगितलं की, ते इस्राईलच्या प्रस्तावाचा अभ्यास करत आहेत आणि लवकरच उत्तर देतील.

इजिप्त च्या माहिती सेवेच्या प्रमुखांनी सांगितलं, “हमासला आता वेळेचं महत्त्व कळलं आहे. मला वाटतं, ते लवकरच इस्राईलच्या प्रस्तावाला उत्तर देतील.” पण इजिप्त आणि पॅलेस्टाईनने सांगितलं की, सोमवारी काहिरामध्ये शांतता आणि बंधकांच्या सुटकेसाठी झालेली बोलणी यशस्वी झाली नाही. हमासचं म्हणणं आहे की, जानेवारी २०२५ मध्ये ठरलेल्या तीन टप्प्यांच्या कराराप्रमाणे इस्राईलने युद्ध थांबवावं आणि सैन्य मागे घ्यावं. दुसरीकडे, इस्राईल ने हमासचा प्रभाव संपवण्याची अट ठेवली आहे, यामुळे चर्चा थांबत आहे.

१९ जानेवारी २०२५ ला गाझामध्ये पहिल्या टप्प्याचा शांतता करार झाला होता. यात काही बंधक आणि कैद्यांची देवघेव झाली. पण हा करार फक्त दोन महिने टिकला. १८ मार्चला इस्राईलने पुन्हा गाझावर हवाई हल्ले सुरू केले. इस्राईल चे पंतप्रधान बेंजामिन नेतन्याहू यांनी सांगितलं, “आम्ही पूर्ण ताकदीने लढाई सुरू केली आहे, आणि ही फक्त सुरुवात आहे.”

काही बातम्यांनुसार, एक नवा प्रस्ताव समोर आला आहे. त्यात हमासने १० बंधक सोडावेत आणि त्याबदल्यात अमेरिकेने इस्राईल ला शांततेच्या दुसऱ्या टप्प्याच्या चर्चेसाठी तयार करावं, असं सुचवण्यात आलं आहे. पण यावर अद्याप कोणताही ठोस निर्णय झालेला नाही.

युद्धाची पार्श्वभूमी

७ ऑक्टोबर २०२३ ला हमासने इस्राईल वर हल्ला केला. या हल्ल्यात सुमारे 1,218 लोक मारले गेले, ज्यात बहुतांश सामान्य नागरिक होते. हमासने 251 लोकांना बंधक बनवलं, त्यापैकी 58 अजूनही गाझामध्ये आहेत. इस्राईल च्या म्हणण्यानुसार, यातले 34 जणांचा मृत्यू झाला आहे. दुसरीकडे, गाझामधील हमासच्या आरोग्य मंत्रालयाने सांगितलं की, 18 मार्चपासून इस्राईल च्या हल्ल्यांमध्ये 1,574 पॅलेस्टाईन लोक मारले गेले. या युद्धात आतापर्यंत एकूण 50,944 लोकांचा मृत्यू झाला आहे.

या युद्धामुळे गाझामधील सामान्य लोकांचं खूप नुकसान झालं आहे. लाखो लोकांना आपली घरं सोडावी लागली आहेत. अनेक कुटुंबं उद्ध्वस्त झाली आहेत. गाझामध्ये अन्न, पाणी, औषधं आणि निवारा यांची मोठी कमतरता आहे. रुग्णालयं आणि शाळा उद्ध्वस्त झाल्या आहेत. लहान मुलं आणि वृद्धांना विशेषतः खूप त्रास सहन करावा लागत आहे. युद्धामुळे तिथलं आयुष्य थांबलं आहे, आणि लोकांना पुन्हा नव्याने सुरुवात करण्यासाठी तातडीने मदतीची गरज आहे.

इस्राईलमध्ये बंधकांच्या कुटुंबांनी माध्यमांना सांगितलं, “आम्हाला फक्त आमचं कुटुंब परत हवं आहे.” गाझा आणि इस्राईल मधील हे युद्ध आता दीड वर्षांहून जास्त काळ चाललं आहे. दोन्ही बाजूंना प्रचंड नुकसान झालं आहे. इस्राईल मधील लोकांना सततच्या हल्ल्यांच्या भीतीत जगावं लागत आहे, तर गाझामध्ये सामान्य लोकांचं आयुष्य उद्ध्वस्त झालं आहे. इजिप्त , कतार आणि अमेरिका यांनी शांततेच्या बोलणीत मध्यस्थी करण्याचा खूप प्रयत्न केला आहे, पण इस्राईल आणि हमास यांच्यातील अविश्वासामुळे प्रत्येक वेळी चर्चा अयशस्वी होत आहे.

हमासला गाझामध्ये स्वातंत्र्य आणि सुरक्षितता हवी आहे, तर इस्राईल चं म्हणणं आहे की, हमासचा प्रभाव पूर्णपणे संपवल्याशिवाय युद्ध थांबणार नाही. या दोन टोकांच्या मागण्यांमुळे शांततेचा मार्ग खडतर आहे. या युद्धाचा सर्वात मोठा फटका गाझामधील सामान्य लोकांना आणि बंधकांच्या कुटुंबांना बसत आहे. गाझामध्ये मानवी मदतीची तातडीने गरज आहे.

'आवाज मराठी'वर प्रसिद्ध होणारे लेखन, व्हिडिओज आणि उपक्रम यांविषयीचे अपडेट्स मिळवण्यासाठी या लिंक्सवर क्लिक करा -

Awaz Marathi WhatsApp Group
Awaz Marathi Facebook Page

Awaz Marathi Twitter