गाझातील अल-अक्सा रुग्णालयावर इस्राइलचा हल्ला

Story by आवाज़ मराठी | Published by Pradnya Shinde • 2 Months ago

इस्राईली हल्ल्यात भस्मसात झालेले हॉस्पिटलमधील तंबू

गाझामधील अल-अक्सा रुग्णालयावर झालेल्या इस्रायली हल्ल्यामुळे मोठ्या प्रमाणावर जीवितहानी झाली आहे. हल्ल्यानंतर रुग्णालयाच्या आवारातील तंबूंमध्ये आग लागली आणि त्यात अनेक लोक होरपळून मृत्युमुखी पडले आहेत. गाझाच्या मध्यवर्ती भागातील अल-अक्सा रुग्णालयावर हा हल्ला झाला. हल्ल्यानंतर रुग्णालयाच्या आवारात असलेल्या निर्वासित तंबूंपासून मोठ्या प्रमाणावर ही आग पसरली. आगीत अनेक लोक अडकले होते आणि होरपळून त्यांचा मृत्यू झाला.

प्राथमिक माहितीनुसार, या हल्ल्यात किमान १५ लोक ठार झाले असून ५० हून अधिक जखमी आहेत. इस्रायलने दावा केला आहे की त्यांनी हमासच्या एका प्रमुख तळावर हल्ला केला होता. परंतु नागरिकांचा मृत्यू अनपेक्षित होता. इस्रायलच्या संरक्षण दलाने म्हटले आहे की हा हल्ला अचूक होता आणि नागरिकांच्या जीवितहानीचे जोखीम कमी करण्यासाठी त्यांनी सर्व उपाय केले होते.

या हल्ल्यानंतर आंतरराष्ट्रीय पातळीवर तीव्र प्रतिक्रिया उमटल्या आहेत. जागतिक आरोग्य संघटनेने (WHO) आणि इतर मानवी हक्क संघटनांनी या हल्ल्याचा तीव्र निषेध केला आहे आणि त्यांनी वैद्यकीय संस्थांवर अशा हल्ल्यांना रोखण्यासाठी तातडीने उपाययोजना करण्याची मागणी केली आहे. गाझामधील परिस्थिती आता अधिक तणावपूर्ण बनली आहे. हल्ल्यामुळे गाझामध्ये आधीच अस्तित्वात असलेल्या मानवी संकटाला अधिक गंभीर बनवले आहे.

गाझामध्ये ऑक्टोबर २०२३ पासून इस्रायली हल्ल्यांमध्ये किमान ४२,२२७ लोक ठार झाले असून ९८,४६४ लोक जखमी झाले आहेत. तत्पूर्वी ७ ऑक्टोबर २०२३ रोजी इस्रायलमध्ये झालेल्या हल्ल्यात किमान १,१३९ लोक मारले गेले होते आणि २०० हून अधिक लोकांना बंधक बनवण्यात आले होते.