आंतरराष्ट्रीय क्रिकेट परिषदेकडून २०२४ पुरस्कार विजेत्यांची घोषणा करण्यात आली आहे. या पुरस्कारांमध्ये प्रतिष्ठेचा मानला जाणारा सर गारफिल्ड सोबर्स पुरस्कार (आसीसी सर्वोत्तम पुरुष क्रिकेटपटू) भारताचा वेगवान गोलंदाज जसप्रीत बुमराहला जाहीर झाला आहे. जसप्रीत बुमराहने २०२४ वर्षात अफलातून कामगिरी केली होती, त्यामुळेच त्याला हा सन्मान मिळाला आहे. प्रतिष्ठित 'सर गारफिल्ड सोबर्स पुरस्कार' पटकावणारा तो पहिला भारतीय वेगवान गोलंदाज ठरला आहे. तसेच, 'ICC सर्वोत्तम कसोटीपटू २०२४' पुरस्कारही त्याने आपल्या नावे केला आहे.
बुमराहची अविस्मरणीय कामगिरी
बुमराहने २०२४ वर्षभरात क्रिकेटच्या सर्व फॉरमॅट्समध्ये प्रभावी कामगिरी केली. त्याने टी-२० विश्वचषकात भारताला विजेतेपद मिळवून देताना सर्वोत्तम खेळाडूचा किताब पटकावला. त्याने १५ विकेट घेत भारताच्या विजयात महत्त्वाची भूमिका बजावली. त्याचबरोबर, कसोटी क्रिकेटमध्येही त्याने आपले वर्चस्व सिद्ध केले.
२०२४ मध्ये सर्वोत्तम कसोटी गोलंदाज
बुमराहने २०२४ साली एकूण १३ कसोटी सामने खेळले आणि ७१ विकेट्स घेतल्या. १४.९२ च्या सरासरीने विकेट्स घेणारा तो एकमेव वेगवान गोलंदाज ठरला. कसोटी क्रिकेटमध्ये २०० विकेट्सचा टप्पा पार करणारा तो सर्वात वेगवान भारतीय गोलंदाज ठरला आहे. ICC कसोटी क्रमवारीत ९०७ गुण मिळवत त्याने इतिहासातील सर्वोच्च क्रमवारी गाठली.
ICC पुरस्कार विजेते २०२४ – भारतीय खेळाडूंची चमकदार कामगिरी
यंदाच्या पुरस्कार सोहळ्यात भारतीय खेळाडूंनी आपला ठसा उमटवला आहे:
- सर्वोत्तम पुरुष क्रिकेटपटू – जसप्रीत बुमराह (भारत)
- सर्वोत्तम कसोटीपटू – जसप्रीत बुमराह (भारत)
- सर्वोत्तम महिला वनडे क्रिकेटपटू – स्मृती मानधना (भारत)
- सर्वोत्तम पुरुष टी-२० क्रिकेटपटू – अर्शदीप सिंग (भारत)
भारताच्या क्रिकेट इतिहासात नवा अध्याय
बुमराह हा ICC सर्वोत्तम पुरुष क्रिकेटपटू पुरस्कार जिंकणारा भारताचा पाचवा खेळाडू आहे. यापूर्वी राहुल द्रविड (२००४), सचिन तेंडुलकर (२०१०), आर. अश्विन (२०१६) आणि विराट कोहली (२०१७, २०१८) यांनी हा मान पटकावला होता. मात्र, वेगवान गोलंदाज म्हणून हा पुरस्कार जिंकणारा तो पहिलाच भारतीय ठरला आहे.
बुमराहचा आंतरराष्ट्रीय क्रिकेटमधील ठसा
- २०२४ मध्ये ८६ विकेट्स आणि ९७ धावा
- ICC कसोटी क्रमवारीत पहिल्या क्रमांकावर
- २०० कसोटी बळींचा टप्पा सर्वात वेगाने पार करणारा भारतीय गोलंदाज
- २०२४ टी-२० विश्वचषक विजेतेपदात मोलाची भूमिका
भारतीय क्रिकेटसाठी अभिमानाचा क्षण
बुमराहच्या या ऐतिहासिक यशाने भारतीय क्रिकेटच्या सुवर्णयुगाची नोंद झाली आहे. वेगवान गोलंदाज म्हणून जगभरात आपली छाप पाडत त्याने भारतीय संघासाठी हा गौरव संपादन केला.भारतीय संघातील या नव्या यशस्वी पर्वाबद्दल संपूर्ण क्रिकेट विश्वातून अभिनंदनाचा वर्षाव होत आहे.
.jpg "प्रातिनिधिक चित्र")
.jpg "यूएई दौऱ्यावर असताना भारताचे परराष्ट्र मंत्री एस जयशंकर आणि यूएईचे उपपंतप्रधान आणि संरक्षण मंत्री हमदान मोहम्मद यांची भेट")
