मोईनुद्दीन चिश्तींची प्रसिद्ध दर्गाह शिवमंदिर असल्याचा दावा

Story by आवाज़ मराठी | Published by Bhakti Chalak • 1 d ago

अजमेर दर्गा

राजस्थानमधील अजमेर येथील प्रसिद्ध दर्गा हिंदू मंदिर म्हणून घोषित करणारी याचिका कोर्टानने स्वीकारली आहे. न्यायालयाने सर्व पक्षकारांना नोटीस बजावली असून पुढील सुनावणीची तारीख २० डिसेंबर निश्चित केली आहे. वास्तविक, हिंदू सेनेचे विष्णू गुप्ता यांनी अजमेर येथील ख्वाजा मोईनुद्दीन चिश्ती यांच्या दर्गाला हिंदूंचे श्रद्धास्थान म्हणून घोषित करण्यासाठी अजमेर पश्चिम दिवाणी कोर्टात याचिका दाखल केली होती.

या याचिकेवर बुधवारी अजमेर पश्चिम दिवाणी न्यायाधीश वरिष्ठ विभाग मनमोहन चंदेल यांच्या कोर्टात सुनावणी झाली. दरम्यान, याचिकाकर्ता विष्णू गुप्ता यांच्या याचिकेची दखल घेत न्या. मनमोहन चंदेल यांनी दर्गा समिती, अल्पसंख्याक व्यवहार आणि एएसआय यांना समन्स नोटीस बजावण्याचे निर्देश दिले आणि त्यांना पुढील तारखेला हजर राहण्यास सांगितले.

कामगार संघटनेचे सचिव सरवर चिश्ती, अंजुमन सय्यद जदगन यांनी याबाबतचे निवेदन प्रसिद्धीस दिले आहे. ते म्हणाले की, दर्गा ही श्रद्धा आणि जातीय सलोख्याचे प्रतीक आहे आणि जगभरात त्याचे करोडो अनुयायी आहेत. ते म्हणाले की, आम्ही अनेकवेळा सामना केला असून हिंदू सेना गेल्या तीन वर्षांपासून अशी वक्तव्ये करत आहे. अशी परिस्थिती देशाच्या हिताची नाही.

ते म्हणाले की, बाबरी मशीद वादानंतर देशातील परिस्थिती सामान्य होईल, असे आम्हाला वाटले होते, मात्र तसे होत नाही. याचे उत्तर आम्ही कोर्टात देऊ. दर्गा गरीब नवाजचा दर्गा आहे आणि राहील. हे ठिकाण श्रद्धेचे केंद्र असून येथे येणाऱ्या भाविकांच्या मनोकामना पूर्ण होतात. दर्गा हे नेहमीच धार्मिक सौहार्दाचे प्रतीक राहिले आहे आणि हे असे ठिकाण आहे जिथे सर्व धर्माचे लोक समान उत्साहाने येतात.

हिंदू संघटनांचे म्हणणे काय?

हिंदू संघटना अनेक दिवसांपासून अजमेर दर्ग्याला मंदिर म्हणत आहेत. हिंदू संघटना महाराणा प्रताप सेनेने २०२२ मध्ये हे शिव मंदिर असल्याचा दावा करत राजस्थानचे तत्कालीन मुख्यमंत्री अशोक गेहलोत आणि केंद्र सरकारला पत्र लिहून याची चौकशी करण्याची मागणी केली होती. महाराणा प्रताप सेनेच्या पदाधिकाऱ्यांनी एक छायाचित्र पाठवले होते, ज्यामध्ये अजमेर दर्ग्याच्या खिडक्यांवर स्वस्तिक खुणा असल्याचा दावा करण्यात आला होता. संघटनेचे संस्थापक राजवर्धन सिंह परमार यांनी अजमेर दर्गा हे शिवमंदिर असल्याचा दावा केला होता त्यांचे म्हणणे होते की मंदिराचे रूपांतर दर्ग्यात करण्यात आले होते.

अंजुमन कमिटी काय म्हणाली?

अजमेर दर्गा हे शिवमंदिर असल्याच्या दाव्याला अंजुमन कमिटीचे सरवर चिश्ती यांनी विरोध दर्शवला आहे. दर्गा हे सौहार्दाचे प्रतीक असून त्याविरोधात कारवाई करणे हे राष्ट्रहिताचे नाही, असे ते म्हणाले आहेत. सरवर चिश्ती यांनी यासंदर्भातील एक व्हिडीओ सोशल मीडियावर जारी करून म्हटले आहे की, "ख्वाजा मोईनुद्दीन चिश्ती यांचा दर्गा जातीय सलोखा आणि एकात्मतेचे प्रतीक आहे. हा दर्गा विविधतेतील एकता दर्शवत आहे. तसेच अफगाणिस्तानपासून इंडोनेशियापर्यंत या दर्ग्याचे कोट्यावधी मुस्लीम अनुयायी आहेत. त्यामुळे या गोष्टीचा रोज-रोज तमाशा बनवणे ही चांगली गोष्ट नाही."