शक्ती आणि शांतता हाच नव्या भारताचा मंत्र - संरक्षणमंत्री राजनाथ सिंह

Story by Pradnya Shinde | Published by Pradnya Shinde • 8 h ago

यलहंका येथे सुरू झालेल्या 'एरो इंडिया' मध्ये सूर्यकिरण पथकाने सादर केलेल्या चित्तथरारक कवायती.

"संरक्षणसज्जता नसेल तर शांतता प्रस्थापित होऊ शकत नाही," असे स्पष्ट प्रतिपादन संरक्षण मंत्री राजनाथ सिंह यांनी सोमवारी यलहंका येथील ‘एरो इंडिया २०२५’च्या उद्घाटन सोहळ्यात केले. या भव्य हवाई शोमध्ये देश-विदेशातील लढाऊ विमाने, अत्याधुनिक तंत्रज्ञान आणि संरक्षण क्षेत्रातील नाविन्यपूर्ण संशोधनांचे भव्य प्रदर्शन पाहायला मिळाले.

यलहंका येथील हवाई दलाच्या तळावर आयोजित या शोचे उद्घाटन संरक्षणमंत्री राजनाथ सिंह यांच्या हस्ते पार पडले. या वेळी कर्नाटकचे उपमुख्यमंत्री डी. के. शिवकुमार उपस्थित होते. राजनाथ सिंह यांनी भारताच्या संरक्षण क्षेत्रातील वाढत्या ताकदीचा उल्लेख करत, "शांतता आणि शक्ती हा आपला मंत्र बनला पाहिजे. आपण बळकट राहून जागतिक स्तरावर आपले स्थान सिद्ध करायला हवे," असे मत व्यक्त केले.

भारताचे स्थैर्य आणि जागतिक सहभाग

राजनाथ सिंह यांनी जागतिक अस्थिरतेचा संदर्भ देत सांगितले की, "एक मोठा देश म्हणून भारत नेहमीच शांततेचा समर्थक राहिला आहे. 'एरो इंडिया'मध्ये परदेशी प्रतिनिधींची उपस्थिती हे दर्शवते की ते 'एक भूमी, एक कुटुंब, एक भविष्य' या आमच्या भूमिकेचे पाठबळ देत आहेत." त्यांनी पुढे सांगितले की, पंतप्रधान नरेंद्र मोदी यांच्या नेतृत्वाखाली मागील १० वर्षांत भारताने विमानवाहतूक क्षेत्रात मोठी प्रगती केली आहे. संरक्षण क्षेत्रासाठी १,०८० लाख कोटी रुपयांची तरतूद अर्थसंकल्पात करण्यात आली आहे, जे भारताच्या संरक्षण क्षेत्रातील आत्मनिर्भरतेचे प्रतीक आहे.

ब्रेन ड्रेन रोखण्यासाठी प्रयत्न गरजेचे – डी. के. शिवकुमार

कर्नाटकचे उपमुख्यमंत्री डी. के. शिवकुमार यांनी बंगळुरूच्या औद्योगिक क्षमता आणि संशोधन क्षेत्रातील प्रगतीबद्दल बोलताना सांगितले की, "बंगळुरू एरोस्पेस उद्योगासाठी सर्वोत्तम केंद्र आहे. विमान आणि हेलिकॉप्टर उत्पादन सुविधांसाठी हे एक आदर्श ठिकाण आहे." त्यांनी ब्रेन ड्रेनच्या समस्येवर भर देत सांगितले की, "आम्ही जागतिक दर्जाच्या संशोधन संस्थांसोबत काम करत आहोत. उद्योजकतेला चालना देणारे धोरण तयार करून देशातील प्रतिभा भारतात टिकवून ठेवण्यावर आमचे लक्ष आहे."

‘सूर्यकिरण’ पथकाच्या हवाई कसरतींनी मंत्रमुग्ध प्रेक्षक

‘एरो इंडिया २०२५’मध्ये तब्बल ९०० स्टॉल्स उभारण्यात आले असून, देशी आणि विदेशी विमान कंपन्यांनी आपल्या अत्याधुनिक तंत्रज्ञानाचे सादरीकरण केले. यावेळी भारतीय हवाई दलाच्या ‘सूर्यकिरण’ पथकाने थरारक हवाई कसरती सादर केल्या.

या पथकाने तीन, पाच, सहा आणि नऊ विमानांचा ताफा एकाचवेळी आकाशात उडवत अप्रतिम समन्वय आणि साहस दाखवले. या रोमांचक सादरीकरणाने उपस्थित प्रेक्षक मंत्रमुग्ध झाले. संरक्षणमंत्री राजनाथ सिंह यांनी देखील या हवाई कवायतींचा आस्वाद घेतला आणि भारतीय हवाई दलाच्या क्षमतेचे कौतुक केले.

नव्या तंत्रज्ञानाच्या दिशेने भारताची वाटचाल

‘एरो इंडिया २०२५’ हा केवळ एक हवाई शो नसून, संरक्षण क्षेत्रात भारताच्या नव्या तंत्रज्ञान आणि संशोधन क्षमतेचे दर्शन घडवणारा भव्य मेळावा आहे. स्वदेशी उत्पादनांना चालना देणे, संरक्षण उपकरणांच्या उत्पादनात आत्मनिर्भर होणे आणि आंतरराष्ट्रीय भागीदारी वाढवणे या दृष्टीने हा शो अत्यंत महत्त्वाचा ठरतो.

भारतीय संरक्षण क्षेत्राची ताकद अधिक दृढ करण्याच्या दिशेने ही भक्कम पावले टाकली जात असून, ‘एरो इंडिया २०२५’ भारताच्या जागतिक महत्त्वाकांक्षेचा आणखी एक मैलाचा दगड ठरेल, असे मत अनेक तज्ज्ञांनी व्यक्त केले आहे.