पहलगाम हल्ल्यानंतर जम्मू-काश्मीरमध्ये सुरक्षा यंत्रणेकडून झाडाझडती

Story by आवाज़ मराठी | Published by Bhakti Chalak • 11 h ago

प्रातिनिधिक फोटो

जम्मू-काश्मीरात २२ एप्रिलला झालेल्या दहशतवादी हल्ल्यानंतर पोलिस आणि सुरक्षा यंत्रणा सतर्क झाल्या आहेत. सोमवारी (२८ एप्रिल) जम्मू-काश्मीर पोलिसांनी डोडा जिल्ह्यात १३ ठिकाणी छापे टाकले. या कारवाईत पोलिसांनी दहशतवाद्यांचे अड्डे उद्ध्वस्त केले. तसेच दहशतवादी कारवायांशी संबंधित लोकांवर मोठी कारवाई केली.

पहलगाम हल्ल्यानंतर सुरक्षा यंत्रणा सतर्क

पहलगामच्या बैसरन खोऱ्यात झालेल्या भ्याड हल्ल्यात २६ जणांचा मृत्यू झाला. यात बहुतांश पर्यटक होते. मृतांमध्ये एक नागरिक नेपाळचा होता. या हल्ल्यात अनेक जण जखमी झाले. हल्ल्यानंतर सुरक्षा यंत्रणा अधिक सावध झाल्या आहेत.

श्रीनगरातही मोठी कारवाई

यापूर्वी श्रीनगर पोलिसांनी दहशतवादी संघटनांच्या सहाय्यक आणि सहकाऱ्यांच्या घरांवर मोठ्या प्रमाणात शोधमोहीम राबवली. ही कारवाई बेकायदा कृत्य प्रतिबंधक कायद्यांतर्गत (UAPA) नोंदवलेल्या प्रकरणांच्या तपासासाठी झाली.

६३ घरांची झडती

पोलिसांनी प्रसिद्ध केलेल्या पत्रकात सांगितले की, श्रीनगरमध्ये ६३ लोकांच्या घरांची तपासणी झाली. ही तपासणी कायदेशीर पद्धतीने झाली. यावेळी कार्यकारी दंडाधिकारी आणि स्वतंत्र साक्षीदार उपस्थित होते. वरिष्ठ पोलीस अधिकाऱ्यांनी यावर देखरेख ठेवली. शस्त्रे, कागदपत्रे, डिजिटल उपकरणे जप्त करणे आणि पुरावे तसेच गुप्त माहिती गोळा करणे हा या कारवाईचा उद्देश होता. देशाच्या सुरक्षेला धोका निर्माण करणारी कोणतीही कटकारस्थाने किंवा दहशतवादी कारवाया रोखणे हे यामागचे लक्ष्य आहे.

पर्यटनावर परिणाम

कटरा हॉटेल अँड रेस्टॉरंट असोसिएशनचे अध्यक्ष राकेश वझीर यांनी सोमवारी सांगितले की, पहलगाममधील हल्ल्यानंतर जम्मूतील पर्यटन व्यवसाय आणि हॉटेल बुकिंगवर मोठा परिणाम झाला. त्यांच्या मते आतापर्यंत ३५ ते ३७ टक्के बुकिंग रद्द झाले आहेत.

पर्यटकांची संख्या घटली

राकेश वझीर म्हणाले की, पहलगाम हल्ल्याने पर्यटन उद्योगाला मोठा फटका बसला. येथे येणाऱ्या पर्यटकांची संख्या ४५ हजारांवरून २० ते २२ हजारांवर आली आहे.