पहलगाम हल्ल्याचा मुस्लिमांकडून करण्यात येतोय निषेध

Story by आवाज़ मराठी | Published by Fazal Pathan • 20 h ago

पहलगाम हल्ल्याचा निषेध करताना मुस्लिम समाज

पहलगाम येथील दहशतवादी हल्ल्याचा देशभरातील मुस्लिम समाजाकडून तीव्र निषेध करण्यात येत आहे. नुकतेच मुंब्रा, खर्डी, पालघर, पनवेल मुस्लिम समाजाने रस्त्यावर येत दहशतवादी हल्ल्याचा निषेध केला. यावेळी त्यांनी निरपराध नागरिकांचा बळी घेणाऱ्या दहशतवाद्यांना त्यांच्या घरात शिरून खात्मा करण्याची मागणी केली. हा निषेध मोर्चा मुंब्राचे आमदार जितेंद्र आव्हाड यांच्या नेतृत्वात निघाला होता. यावेळी कौसा जामा मशीद, रिझवी बाग मस्जीद, तनवीर नगर, रशीद कंपाऊंड येथे निदर्शने करण्यात आली. यावेळी त्यांन पाकिस्तान मुर्दाबाद, 'हमारी जान... हिंदुस्थान' अशा घोषणा दिल्या. तर दुसरीकडे मुस्लीम महिलांनी दहशतवाद्यांच्या प्रतिकात्मक प्रतिकृतीला जोड्याने मारत निषेध केला.

खडर्डी येथे पहलगाम हल्ल्याचा निषेध

खडर्डी येथील मुस्लीम बांधवांनी एकत्र येत दहशतवादी हल्ल्याचा तीव्र निषेध करत निदर्शन केली. मुस्लीम बांधवांनी हाताला काळ्या फिती बांधून कादरी मस्जिदमध्ये नमाज अदा केली. यावेळी दहशतवादी हल्ल्यात मृत्युमुखी पडलेल्या निष्पाप नागरिकांना श्रद्धांजली अर्पण करत दहशतवाद्यांवर केंद्र सरकारने तत्काळ कारवाई करावी अशी मागणी केली.

औरंगाबाद येथे एमआयएमने नोंदवला निषेध

औरंगाबाद येथील क्रांती चौकात पाकिस्तानचा झेंडा जाळत एमआयएमने पहलगाम दहशतवादी हल्ल्याचा निषेध केला. यावेळी एमआयएम नेते आणि माजी खासदार इम्तियाज जलील म्हणाले, "आता भाषणबाजी बंद करून पंतप्रधानांनी थेट कारवाई करावी.केंद्र सरकार जी कारवाई करेल त्याला आमचा पाठिंबा असेल." यावेळी जमलेल्या मुस्लिम समुदायाने हल्ल्यात मृत्युमुखी पडलेल्या पर्यटकांना श्रद्धांजली अर्पण केली. शिवाय 'काश्मिरसे आवाज आयी... हिंदू- मुस्लीम भाई भाई, मुर्दाबाद मुर्दाबाद... पाकिस्तान मुर्दाबाद, फासी दो फासी दो, आतंकवादियों को फासी दो, आयएसआय मुर्दाबाद' अशा घोषणा दिल्या.

केडगाव मुस्लिम बांधवांकडून पहलगाम हल्ल्याचा निषेध

पहलगाम येथे झालेल्या दहशतवादी हल्ल्याचा केडगाव येथील शाही जामिया मशिदीच्या वतीने मुस्लिम बांधवांनी काळ्याफिती बांधून निषेध व्यक्त करत शुक्रवारची नमाज अदा केली. हल्ल्यात मृत्युमुखी पडलेल्या नागरिकांना श्रद्धांजली अर्पण करण्यात आली.

यावेळी उस्मान मनियार म्हणाले, “पहलगाममध्ये पाकिस्तानी दहशतवाद्यांनी भारतीय पर्यटकांवर क्रूरपणे हल्ला केला. ही एक मानवतेला काळिमा फासणारी घटना आहे. अतिरेक्यांच्या हल्ल्याला चोख प्रत्युत्तर देण्याची गरज आहे. गोळ्या झाडणाऱ्या दहशतवाद्यांसह पाकिस्तानला धडा शिकवा, अशी केडगावमधील मुस्लिम समाजाची मागणी आहे.”

अहमदनगर सर्जेपुरा भागात नमाजनंतर मृतांना श्रद्धांजली

काश्मीर खोऱ्यातील पहलगाम जवळील बायसरन भागात झालेल्या अमानवी दहशतवादी हल्ल्याचा शहरातील मुस्लिम समाजाच्या वतीने तीव्र निषेध नोंदविण्यात आला. या घटनेत बळी पडलेल्या निष्पाप २६ नागरिकांना श्रद्धांजली वाहण्यात आली.

शुक्रवारी दुपारी सर्जेपुरा येथील तांबोळी कब्रस्तान मरकज येथे नमाज अदा केल्यानंतर श्रद्धांजली सभा आयोजित करण्यात आली होती. यावेळी मुस्लिम समाजातील नागरिकांनी काळ्या फिती लावून या भ्याड हल्ल्याचा विरोध दर्शवला.

अब्दुल सलाम खोकर म्हणाले की, “दहशतवादाचा कोणताही धर्म नसतो. हे माणुसकीच्या तत्त्वांना पायदळी तुडवणारे कृत्य आहे. बायसरनमध्ये घडलेली घटना ही संपूर्ण मानवजातीच्या विरोधात आहे. अशा भ्याड हल्ल्यांमुळे समाजात दहशतीचं वातावरण निर्माण होतं.”

तर हाजी मन्सूर शेख म्हणाले की, “ईस्लाम हा शांती, प्रेम, सहिष्णुता व मानवी मूल्यांचा धर्म आहे. कोणत्याही परिस्थितीत दहशतवादाचे समर्थन इस्लाम करत नाही. धर्माविरोधातील हे कृत्य आहे. निष्पाप लोकांचे प्राण घेणाऱ्यांना मानवी समुदायात जागा नाही. मुस्लिम समाज या घटनेचा तीव्र निषेध करतो. अशा प्रवृत्तीच्या विरोधात सर्व भारतीय खंबीरपणे उभे आहोत.”

छत्रपती शिवाजी मुस्लिम ब्रिगेडतर्फे पहलगाम हल्ल्याचा निषेध

जम्मू काश्मीरमधील पहलगाम येथील भारतीय पर्यटकांचा दहशतवाद्यांनी जीव घेतला. या भ्याड कृत्याचा निषेध व्यक्त करण्यात आला आणि मृत भारतीय बांधवांना विजापूर वेस येथे छत्रपती शिवाजी मुस्लिम ब्रिगेडच्यावतीने श्रद्धांजली अर्पण करण्यात आली.

यावेळी मेणबत्ती पेटवून पुष्प अर्पण करून आदरांजली वाहण्यात आली. समस्त मुस्लिम मावळ्यांच्यावतीने जाहीर निषेध व्यक्त करण्यात आला. आम्ही सारे भारतीय एकोप्याने आणि बंधुत्व जपणारे आहोत, भ्याड हल्ला करणाऱ्या आतंकवाद्यांना कठोर कारवाई करावी अशी मागणी ही करण्यात आली.

सोलापूर येथील नरखेडच्या मुस्लिम बांधवांकडून पहलगाम हल्ल्याचा निषेध

काश्मीरमधील पहलगाम येथे दहशतवाद्यांनी केलेल्या भ्याड हल्ल्यात भारतीय पर्यटक मारले गेले. या पार्श्वभूमीवर नरखेड जामा मशिदीमध्ये मुस्लिम बांधवांनी या हल्ल्याचा तीव्र निषेध करीत हल्ल्यात मृत्युमुखी पडलेल्या नागरिकांना श्रद्धांजली अर्पण केली.

नाशिक येथे हल्ल्याच्या निषेधार्थ रॅली

पहलगाम दहशतवादी हल्ल्याचा नाशिक येथील मुस्लीम समाजाकडून निषेध करण्यात आला. यावेळी ज्येष्ठ धर्मगुरु तथा खतीब-ए-शहर हाफिज हिसामुद्दीन अशरफी यांनी या घटनेचा तीव्र शब्दांत निषेध व्यक्त केला आहे. ते म्हणाले, "दहशतवादी हल्ला किंवा कोणत्याही प्रकारची हिंसेला इस्लाम धर्मात अजिबात थारा नाही. निष्पाप लोकांना मारण्याची शिकवण इस्लाम देत नाही. दरम्यान, शहरातील मुस्लीम समाजातील सर्वात मोठी शैक्षणिक संस्था म्हणून प्रसिद्ध असलेल्या नॅशनल उर्दू कॉलेजच्या कॅम्पसमध्ये विद्यार्थी व कर्मचाऱ्यांनी निषेध रॅली काढली.

सिंधुदुर्ग येथे दहशतवादी हल्ल्याचा निषेध

कुडाळ येथील मुस्लिम समाजाने पहलगाम येथील दहशतवादी हल्ल्याचा निषेध नोंदवला. यावेळी त्यांनी कुडाळच्या तहसीलदारांच्या यांच्या मार्फत राज्य व केंद्र शासनाला अशा घटनांना आळा घालण्यासाठी केंद्र शासनाने कडक पावले उचलावीत व संबंधित दोषींवर कठोर कारवाई करावी अशी मागणी केली.

'आवाज मराठी'वर प्रसिद्ध होणारे लेखन, व्हिडिओज आणि उपक्रम यांविषयीचे अपडेट्स मिळवण्यासाठी या लिंक्सवर क्लिक करा -

Awaz Marathi WhatsApp Group
Awaz Marathi Facebook Page

Awaz Marathi Twitter