SCO शिखर परिषदेसाठी जयशंकर जाणार पाकिस्तानला

Story by Sameer D. Shaikh | Published by Fazal Pathan • 1 Months ago

परराष्ट्र मंत्री एस जयशंकर

भारतीय परराष्ट्र मंत्री एस जयशंकर १५ -१६ ऑक्टोबर २०२४ रोजी पाकिस्तानातील इस्लामाबाद येथे होणाऱ्या शांघाय को-ऑपरेशन ऑर्गनायझेशन (SCO) शिखर परिषदेच्या बैठकीत सहभागी होणार आहेत. ही परिषद विविध आर्थिक, सामाजिक-सांस्कृतिक, आणि मानवीय सहकार्याच्या मुद्द्यांवर चर्चा करण्यासाठी आयोजित केली जाते. या दौऱ्यामुळे दीर्घकाळानंतर भारताच्या उच्चस्तरीय प्रतिनिधींचे पाकिस्तानला भेट देणे महत्त्वाचे ठरणार आहे.

या दौऱ्याविषयी परराष्ट्र मंत्रालयाचे प्रवक्ते रणधीर जायसवाल म्हणाले, 'डॉ. जयशंकर शांघाय को-ऑपरेशन ऑर्गनायझेशन (SCO) च्या परिषदेचे नेतृत्व करणार आहेत. सध्या या दौऱ्यादरम्यान कोणत्याही द्विपक्षीय बैठकीची शक्यता नाही, परंतु जर काही बदल झाले, तर आम्ही त्याबद्दल माहिती देऊ."

यापूर्वी २०१५ मध्ये तत्कालीन परराष्ट्र मंत्री सुषमा स्वराज यांनी पाकिस्तानला भेट दिली होती. त्यानंतर २०१६ मध्ये तत्कालीन गृहमंत्री राजनाथ सिंह यांची भेट पाकिस्तानमध्ये झाली होती. जयशंकर यांचा हा दौरा, या उच्चस्तरीय दौऱ्यांच्या श्रेणीतलाच आहे, ज्यामुळे भारत-पाक संबंधांवर त्याचा काय परिणाम होतो हे पाहावे लागेल.

भारतीय पंतप्रधानांना निमंत्रण:

पाकिस्तानने आधी या परिषदेसाठी पंतप्रधान नरेंद्र मोदी यांना निमंत्रण दिले होते, परंतु त्यांच्याऐवजी जयशंकर हे भारताचे प्रतिनिधीत्व करतील.

भारत-पाकिस्तान संबंधांचा तणाव:

जयशंकर यांचा हा दौरा, गेल्या काही वर्षांतील तणावग्रस्त भारत-पाक संबंधांच्या पार्श्वभूमीवर होत आहे. २०१९ मध्ये भारताने जम्मू-काश्मीरला विशेष दर्जा देणारे कलम ३७० रद्द केले होते, ज्यामुळे पाकिस्तानकडून तीव्र विरोध व्यक्त केला गेला होता. याशिवाय, भारताने २०१६ आणि २०१९ मध्ये पाकिस्तानातील दहशतवादी तळांवर सर्जिकल स्ट्राईकही केले होते.

द्विपक्षीय बैठका नाहीत:

परराष्ट्र मंत्रालयाच्या प्रवक्त्यांनी स्पष्ट केले आहे की या दौऱ्याचा उद्देश फक्त SCO परिषदेसाठी आहे आणि सध्या पाकिस्तानसोबत कोणत्याही द्विपक्षीय बैठका ठरलेल्या नाहीत. परंतु या संदर्भात काही बदल झाल्यास अधिकृतरित्या माहिती दिली जाईल.

SCO परिषदेचे महत्त्व:

शांघाय को-ऑपरेशन ऑर्गनायझेशन (SCO) एक बहुपक्षीय संघटना आहे, ज्यात भारत, पाकिस्तान, चीन, रशिया यासारख्या प्रमुख देशांचा समावेश आहे. या परिषदेच्या माध्यमातून सदस्य देशांमध्ये आर्थिक, सुरक्षाविषयक, सांस्कृतिक आणि मानवीय सहकार्याला चालना दिली जाते. जयशंकर यांच्या दौऱ्याद्वारे भारत आणि पाकिस्तानच्या परस्पर संबंधांवर काही बदल होईल का, हे पाहणे उत्सुकतेचे ठरेल.

एस जयशंकर यांच्या या दौऱ्याने आंतरराष्ट्रीय स्तरावर मोठे लक्ष वेधले आहे. दोन्ही देशांमधील तणाव आणि शांघाय सहयोग परिषदेच्या महत्त्वपूर्ण चर्चेमुळे हा दौरा ऐतिहासिक ठरणार हे निश्चित.

'आवाज मराठी'वर प्रसिद्ध होणारे लेखन, व्हिडिओज आणि उपक्रम यांविषयीचे अपडेट्स मिळवण्यासाठी या लिंक्सवर क्लिक करा -

Awaz Marathi WhatsApp Group
Awaz Marathi Facebook Page

Awaz Marathi Twitter