लष्करप्रमुख द्विवेदी आज काश्मीरला देणार भेट

Story by आवाज़ मराठी | Published by Bhakti Chalak • 13 h ago

लष्करप्रमुख जनरल उपेंद्र द्विवेदी

जम्मू-काश्मीरमधील पहलगाम येथे मंगळवारी झालेल्या दहशतवादी हल्ल्यानंतर लष्करप्रमुख जनरल उपेंद्र द्विवेदी आज श्रीनगरला भेट देत आहेत. काश्मीर खोऱ्यातील सध्याची सुरक्षा परिस्थिती तपासणे आणि पुढील रणनीती ठरवणे हा या दौऱ्याचा उद्देश आहे.

सीमेवरील तणाव आणि उच्चस्तरीय बैठक

संरक्षण अधिकाऱ्यांनी सांगितले की, जनरल द्विवेदी श्रीनगरसह उधमपूर येथील उत्तर कमांड मुख्यालयालाही भेट देतील. तिथे ते लष्कराच्या वरिष्ठ कमांडर आणि इतर सुरक्षा यंत्रणांच्या अधिकाऱ्यांशी चर्चा करतील. काश्मीरमधील अंतर्गत सुरक्षा, नियंत्रण रेषेवर पाकिस्तानकडून होणारी शस्त्रसंधी उल्लंघने आणि सीमेपलीकडून होणारा दहशतवाद यावर त्यांचे विशेष लक्ष असेल.

देशभर निषेध

या हल्ल्याविरोधात देशातील अनेक शहरांत निदर्शने झाली. पाकिस्तानविरोधात घोषणाबाजी आणि कठोर कारवाईची मागणी होत आहे. सामान्य नागरिक आणि राजकीय पक्ष या हल्ल्याला देशाच्या सुरक्षेवर आणि सार्वभौमत्वावर हल्ला मानत आहेत.

संतापाची लाट

२२ एप्रिलला पहलगाममधील बैसारण मैदानावर दहशतवाद्यांनी पर्यटकांवर हल्ला केला. यात २५ भारतीय आणि एका नेपाळी पर्यटकाचा मृत्यू झाला. अनेक जण गंभीर जखमी झाले. पर्यटक बैसारणमध्ये फिरत असताना हा हल्ला झाला. या घटनेनंतर देशभर संताप पसरला. पाकिस्तानविरोधात कठोर कारवाईची मागणी होत आहे.

या हल्ल्यानंतर केंद्र सरकारने कठोर निर्णय घेतले:

अटारी सीमेवरील एकात्मिक तपासणी चौकी तात्काळ बंद.

पाकिस्तानी नागरिकांसाठी सार्क व्हिसा सवलत योजना स्थगित

पाकिस्तानी नागरिकांना ४८ तासांत भारत सोडण्याचे आदेश

दोन्ही देशांच्या उच्चायुक्तालयातील संरक्षण, नौदल आणि वायुसेना सल्लागारांना परत बोलावले

परराष्ट्र सचिव विक्रम मिस्री यांनी सांगितले की, नवी दिल्लीतील पाकिस्तानी उच्चायुक्तालयातील संरक्षण सल्लागारांना अवांछित व्यक्ती घोषित केले. तसेच त्यांना एका आठवड्यात भारत सोडण्यास सांगितले.

पहलगाम हल्ल्याच्या प्रत्युत्तरात सरकारने १९६० चा सिंधू जल करार स्थगित केला. ही आतापर्यंतची सर्वात कठोर राजनैतिक कारवाई मानली जाते.